2025 — ГОД БЛАГАЎПАРАДКАВАННЯ

Прэзідэнт Аляксандр Лукашэнка падпісаў Указ №1, згодна з якім 2025 год абвешчаны Годам благаўпарадкавання.

2025 год дае старт пяцігодцы якасці і прадугледжвае комплекс мерапрыемстваў, накіраваных на стварэнне і падтрымку зручнага, бяспечнага, сучаснага і эстэтычна арганізаванага асяроддзя жыццядзейнасці людзей. Рэалізоўваць гэтыя мерапрыемствы дзяржава будзе сумесна з арганізацыямі і грамадзянамі.

У 2025 годзе будуць прыняты маштабныя меры, у тым ліку па навядзенні парадку на зямлі, благаўпарадкаванні населеных пунктаў, вытворчых аб’ектаў, падтрыманні ў належным стане тэрыторый уздоўж аўтамабільных і чыгуначных дарог. Адбудуцца не менш за два рэспубліканскія суботнікі.

Ураду даручана цягам месяца зацвердзіць рэспубліканскі план мерапрыемстваў Года благаўпарадкавання.

Указ прадугледжвае актывізацыю валанцёрскага руху і рэалізацыю грамадзянскіх ініцыятыў, накіраваных на благаўпарадкаванне краіны.

Год благаўпарадкавання прызваны аб’яднаць намаганні дзяржавы і грамадства дзеля далейшага паляпшэння якасці жыцця ў Рэспубліцы Беларусь.