Супрацоўнікі ААТ «Бархім» наведалі прэм’еру дакументальнага фільма пра Баранавіцкае гета.

Сёння, у Дзень памяці ахвяр Халакосту, супрацоўнікі ААТ «Бархім» прынялі ўдзел у прэм’ерным паказе дакументальнага фільма «Дзённік доктара Левінбука», прысвечанага падзеям і ахвярам Баранавіцкага гета (28 чэрвеня 1941 — 17 снежня 1942). Фільм расказвае пра жыццё Доктара Зельмана Левінбука, ураджэнца Баранавічаў, які разам з сям’ёй прайшоў праз жахлівыя выпрабаванні Халакоста. Цудам яму, жонцы і сыну ўдалося збегчы з лагера і захаваць жыццё, пра што ён пазней расказваў следчым на пасляваенных допытах. Кінахроніка таксама ўключае кадры Суда Ваеннага трыбунала 1962 года ў Баранавічах, дзе былі вынесены смяротныя прыгаворы былым ахоўнікам Калдычэўскага лагера смерці, іх памагатым і саўдзельнікам тых жудасных падзей. Сёння асабліва важна, каб урокі Халакосту захоўваліся ў памяці наступных пакаленняў і служылі папярэджаннем супраць актаў генацыду ў будучыні.